JUMUIYA YA WAZAZI CCM KIBONDO YAADHIMISHA WIKI YA WAZAZI 2026 KWA KUFANYA USAFI NA MATENDO YA HURUMA

Mwenyekiti wa Chama Cha Mapinduzi (CCM), Wilaya ya Kibondo Hamisi Salumu Tahiro ambaye pia ni Mjumbe wa Baraza la Wazazi Mkoa wa Kigoma akihutubia kwenye Maadhimisho ya Wiki ya Jumuiya ya Wazazi ya CCM 2026 yaliyofanyika Kiwilaya Kata ya Kizazi. Tahiro alikuwa mgeni rasmi kwenye maadhimisho hayo,

.....................................

JUMUIYA ya Wazazi ya Chama Cha Mapinduzi (CCM) Wilaya ya Kibondo Mkoa wa Kigoma katika kuadhimisha wiki ya Wazazi 2026 imeshiriki shughuli mbalimbali za kijamii ikiwemo kufanya usafi na matendo ya huruma kwa wenye uhitaji.

Maadhimisho hayo yaliyofanyika Aprili 9, 2026 yalishirikisha viongozi mbalimbali wa Serikali, CCM pamoja na Wananchi yakiongozwa na Mwenyekiti wa Chama Cha Mapinduzi (CCM) wa Wilaya ya Kibondo Hamisi Salumu Tahiro ambaye pia ni Mjumbe wa Baraza la Wazazi Mkoa wa Kigoma.

Tahiro akihutubia kwenye maadhimisho hayo alihimiza malezi kwa watoto na kudumisha mshikamano ambapo alitumia nafasi hiyo kupongeza juhudi za maendeleo alizozifanya Mbunge wa Jimbo la Muhambwe Dkt. Florence Samizi ambaye pia ni Naibu Waziri wa Afya ikiwemo kujenga Kituo cha Afya Kata ya Kizazi fedha kutoka Serikali Kuu zilizotolewa na Rais Samia na mchango wa mfuko wa jimbo sanjari na ujenzi wa Zahanati ya Kijiji cha Kasana.

“Kwa maendeleo haya tuliyoyapata tunamshukuru sana Rais wa Jamhuri ya Muungano wa Tanzania na Mwenyekiti wa CCM Taifa Dkt. Samia Suluhu Hassani na mbunge wetu Dkt. Florence Samizi,” alisema Tahiro.

Aidha, Tahiro alihimiza utunzaji wa mazingira akieleza jambo hilo ni la muhimu sana na ndiyo maana moja ya ratiba yao katika maadhimisho hayo ilikuwa ni kufanya usafi.

Katibu wa Jumuiya hiyo Wilaya ya Kibondo, Evarist Msafiri akizungumza kwenye maadhimisho hayo aliwataka wazazi na walezi kuendelea kusimamia malezi ya watoto wao hasa katika suala la maadili nakueleza kuwa vijana wengi siku hizi wamekengeuka hivyo wasipofuatiliwa kwa karibu wataendelea kuharibikiwa.

“Jumuiya yetu ya wazazi jukumu lake kubwa ni kusimamia suala zima la malezi, maadili na elimu hivyo ni vizuri tukawa jirani na watoto wetu kwa ajili ya malezi yao badala ya kuwaacha wakiharibika,” alisema Msafiri.

Aidha, Msafiri alisema Maadhimisho hayo ya wiki ya Wazazi 2026 yamefanyika vizuri huku yakiwa na maudhurio makubwa ambapo alitoa shukurani zake kwa wote waliojitokeza kushiriki na kueleza kuwa wameonesha umoja na mshikamo mkubwa.

Alisema maadhimisho hayo yaliyofanyika kiwilaya katika Kata ya Kizazi Tarafa ya Mabamba yalikuwa ya mafanikio kwani washiriki walijitokeza kwa wingi na kufanya usafi katika viunga vya Kituo cha Afya cha kata hiyo eneo la Nyalugusu.

Alisema mbali na kufanya usafi pia walitoa misaada kwa makundi mbalimbali ya watu wenye Uhitaji wakiwemo wazee tukio lililofanyika kwenye mkutano wa hadhara.

Kwa upande wake Diwani wa Kata ya Kizazi Benson Mahori Bavuma alitumia nafasi hiyo kuelezea utekelezaji wa miradi ya maendeleo iliyofanyika ikiwemo kituo kipya cha afya kilichojengwa na kuwa Serikali tayari imepeleka watumishi ambao wanaendelea na kazi.

“Tunaishukuru Serikali chini ya Rais Dkt. Samia pamoja na Mbunge Dkt. Florence Samizi kwa jitihada zao za kufanikisha maendeleo katika maeneo yetu haya,” alisema Bavuma.