Kuna jambo la kipekee kuhusu simba jike. Ni mnyama jasiri, mwenye akili ya mbinu na moyo wa kujitoa. Kila alfajiri, simba jike huamka kabla ya wengine, hufuatilia mawindo kwa ustadi, huchunga familia, na huhakikisha hakuna njaa kambini. Ni kiumbe asiyeishi kwa sifa, bali kwa matokeo.
Na hii ndiyo picha halisi aliyoichora Nicholas Kasendamila, Mwenyekiti wa Chama Cha Mapinduzi (CCM) Mkoa wa Geita, alipokuwa akiusimulia umati wa wananchi uliofurika katika Uwanja wa Maonyesho wa EPZ mjini Geita juu ya aina ya uongozi wa Dkt. Samia Suluhu Hassan.
“Watanzania kila unakopita wanakuachia majina yanayoashiria wewe ni mkombozi wetu. Wapo wanaokuita jemedari, mama wa taifa, na wengine jua la matumaini. Lakini mimi leo nasema — wewe ni simba jike, kwa sababu simba jike ndilo hutafuta chakula na kuhakikisha familia inashiba,” alisema Kasendamila huku maelfu ya wananchi wakishangilia kwa nguvu.
Kauli hiyo haikuwa ya kubuni, bali ni taswira ya ukweli kuhusu uongozi wa Dkt. Samia Suluhu Hassan, mgombea urais wa CCM ambaye ziara yake mkoani Geita imeacha alama ya matumaini mapya, dira ya ujasiri, na uthibitisho wa kazi yenye matokeo makubwa.
SAMIA NA KAZI YA SIMBA JIKE – KUTAFUTA NA KULEA TAIFA
Tangu aingie madarakani, Dkt. Samia ameonesha mfano wa kiongozi anayejituma kama simba jike anayetafuta mawindo kwa ujasiri, akihakikisha Watanzania hawakosi maendeleo.
Katika mikutano yake ya kampeni ya Oktoba 12 na 13, 2025, iliyofanyika Mbogwe, Masumbwe, Runzewe, Bukombe na Nyawilimilwa, Dkt. Samia alizungumza kwa lugha ya matumaini na mshikamano, akisisitiza amani, umoja, na kasi mpya ya maendeleo katika sekta zote kuu — madini, maji, kilimo, ufugaji na afya.
“Maendeleo haya tunayoyaona leo siyo ya bahati mbaya, ni matokeo ya amani tuliyoilinda kwa muda mrefu na uongozi makini wa CCM unaosikiliza wananchi wake,” alisema Dkt. Samia huku akishangiliwa kwa hamasa kubwa.
Katika Geita — mkoa wa dhahabu — Serikali ya Awamu ya Sita imewekeza nguvu kubwa katika miradi ya kimkakati. Dkt. Samia amezindua mpango wa kitaifa wa utafiti wa madini wenye lengo la kupima maeneo mapya nchini, ambapo Geita imepewa kipaumbele maalum kama “mkoa wa kimadini.”
“Kwa sasa Tanzania imepimwa kwa asilimia 16 pekee. Lengo letu ni kuongeza wigo huu ndani ya miaka mitano ijayo, na vijana wa Kitanzania ndiyo watakaopewa nafasi ya kwanza,” alieleza Dkt. Samia.
Ahadi hii ni mwendelezo wa mapambano yake ya kuhakikisha madini yanawanufaisha wananchi wengi zaidi — ishara ya simba jike anayetafuta lishe kwa familia nzima, si kwa mkono mmoja.
MAJI, AFYA NA KILIMO – ALAMA ZA MAMA ANAYEJALI
Katika hotuba yake ya Nyawilimilwa, Dkt. Samia aligusa mioyo ya wananchi alipoweka bayana dhamira ya serikali kuendeleza miradi mikubwa ya maji safi na salama, akieleza kuwa hadi sasa upatikanaji wa maji mkoani Geita umefikia asilimia 86, na serikali inaendelea na jitihada za kuifikisha asilimia 100.
Waziri wa Maji, Jumaa Aweso, naye aliongeza joto la matumaini:
“Zaidi ya shilingi bilioni 124 zimetolewa kutekeleza mradi wa maji kutoka Ziwa Victoria hadi Geita. Mheshimiwa Rais ameahidi, na anatekeleza. Huyu ni kiongozi anayeishi kwa vitendo,” alisema kwa msisitizo.
Aweso akakumbusha maneno ya Baba wa Taifa, Mwalimu Julius Kambarage Nyerere:
“Kiongozi hakumbukwi kwa cheo, bali kwa namba za maendeleo alizoacha.”
Na akaongeza:
“Dkt. Samia ataendelea kukumbukwa kwa miradi mikubwa ya maji, barabara, elimu na afya anayoweka kwa wivu wa maendeleo ya wananchi.”
Katika sekta ya afya, Dkt. Samia alitangaza maboresho makubwa katika hospitali ya wilaya ya Geita, ikiwemo mashine za kisasa za CT-Scan, X-ray zinazotembea kitanda kwa kitanda, na mpango wa Bima ya Afya kwa Wote — unaolenga kumaliza tatizo la wananchi kushindwa kulipa gharama za matibabu.
“Tutakapokuwa na bima ya afya kwa wote, mtu hatakufa na maiti kushikiliwa hospitalini kwa kushindwa kulipa. Bima italipa gharama hizo,” alisema kwa msisitizo, akapigiwa makofi ya kishujaa.
Kwa upande wa kilimo na ufugaji, Dkt. Samia aliahidi kujenga machinjio mapya ya kisasa Nyawilimilwa na Nzera, pamoja na majosho 11 ya mifugo ndani ya Geita, ili kuboresha afya ya mifugo na kuinua kipato cha wafugaji.
“Tunaendelea kuweka mazingira mazuri ya wakulima na wafugaji kunufaika zaidi na jasho lao,” alisema kwa ujasiri wa mama anayelinda watoto wake.
WADAU WAMNYOOSHEA KIDOLE CHA HESHIMA
Sauti za wadau wa sekta mbalimbali zimeendelea kuthibitisha kwamba Dkt. Samia ni kiongozi anayefanya, si anayeahidi tu.
Mwenyekiti wa FEMATA, John Bina, akizungumza mbele ya umati wa wachimbaji zaidi ya milioni sita, alisema kwa sauti ya msisitizo:
“Mheshimiwa Rais, wachimbaji wa madini 250 nchini wameamua kukuchagua. Umetuheshimisha. Hapo zamani wachimbaji tulihesabiwa kama waliopotea, leo tunaheshimiwa.”
Bina aliongeza kuwa wachimbaji hao wako tayari “kumlinda Rais kwa wivu”, kutokana na hatua alizochukua za kupunguza kodi na ushuru, pamoja na kuondoa vikwazo vya leseni — hatua zilizoleta heshima na uhalali mpya katika sekta ya madini.
MWISHO WA MANENO, MWISHO WA HESHIMA
Ziara ya kampeni ya Dkt. Samia mkoani Geita imeacha ujumbe mzito: kuwa uongozi wa maono unaleta matokeo, na kwamba Watanzania wanapaswa kuilinda amani, kuimarisha umoja, na kuendeleza kazi zilizopo chini ya uongozi wa CCM.
“Uchaguzi si vita, ni sehemu ya demokrasia inayojenga taifa,” alisisitiza Dkt. Samia.
Kwa jicho la wananchi, na kwa maneno ya Kasendamila, picha ni moja: Tanzania inayoongozwa na Dkt. Samia ni familia salama mikononi mwa simba jike jasiri, anayewinda kwa akili, anayelinda kwa moyo, na anayejituma kwa matokeo.
Na kwa kelele za umati wa Geita, sauti moja ilisikika ikirindima:
“Simba jike, endelea kutafuta mawindo ya maendeleo — taifa lako lipo nyuma yako!”
Imeandaliwa na Victor Bariety -Geita Simu: 0757-856284
0 Comments