Rais na Mgombea Urais kupitia Chama Cha Mapinduzi (CCM), Dk. Samia Suluhu Hassan, akipunga mkono kuwasalimia wananchi na wana CCM wakati akiwasili kuzindua kampeni za uchaguzi wa chama hicho Agosti 28, 2025 uliofanyika Viwanja vya Tanganyika Packers Kawe Jijini Dar es Salaam

......................................

Na Dotto Mwaibale, Dar es Salaam

Leo ni siku ya kihistoria kwa mkoa wa Morogoro na taifa kwa jumla. Rais na Mgombea Urais kupitia Chama Cha Mapinduzi (CCM), Dk. Samia Suluhu Hassan, ameanza rasmi ziara ya kitaifa ya kampeni za uchaguzi mkuu wa mwaka 2025. Ziara hii si ya kawaida, bali ni mwanzo wa safari mpya ya mageuzi yanayolenga kuibadilisha Tanzania kwa maslahi mapana ya kizazi cha sasa na vizazi vijavyo.

Katika hotuba yake ya uzinduzi wa kampeni jijini Dar es Salaam jana, Rais Samia alieleza kwa uwazi dira ya Serikali atakayoiongoza endapo atachaguliwa, akianzia na mpango wa siku 100 za mwanzo. Hizi si ahadi za kisiasa tu, bali ni ahadi za matumaini ya kweli.

 Miongoni mwa mambo ya mwanzo ni kutoa huduma za bure za afya kwa wazee, wajawazito na watoto kupitia mfumo wa bima ya afya kwa wote—hatua ya awali ya kuijenga Tanzania yenye usawa katika huduma za afya.

Zaidi, Serikali itapiga marufuku hospitali kuzuia miili ya marehemu kwa madai ya madeni ya matibabu. Hatua hii inalenga kulinda utu wa binadamu na kurejesha heshima katika familia wakati wa majonzi.

 Sambamba na hilo, ajira mpya 5,000 kwa wauguzi na wakunga zitatolewa, huku pia serikali ikigharamia vipimo ghali vya moyo, figo, mishipa ya fahamu na mifupa kwa wananchi wasio na uwezo.

Sekta ya elimu nayo imepewa kipaumbele cha juu. Rais Samia amesisitiza kuwa kila mtoto wa darasa la tatu atakuwa na uwezo wa kusoma na kuandika pasipo shida, huku walimu 7,000 wa masomo ya sayansi na hisabati wakiandaliwa kuajiriwa mara moja. Hii ni dhamira ya kuandaa taifa la kesho lenye ushindani wa kitaifa na kimataifa.

Vijana na wajasiriamali wadogo hawajasahaulika. Serikali itatenga Shilingi bilioni 200 kwa ajili ya mitaji, kurasimisha mama lishe, bodaboda na wafanyabiashara wadogo. Hii ni fursa ya kuwaingiza kwenye mfumo rasmi wa uchumi wa taifa, na kuwainua kutoka kipato cha chini kwenda kwenye hatua ya ujasiriamali endelevu.

Katika siku hizo 100, Serikali pia itazindua mpango wa pamoja wa kushirikisha vyuo vya ufundi, vyuo vikuu na waajiri ili wanafunzi wa VETA wapate nafasi za kufanya mazoezi viwandani. Aidha, mpango wa mitaa ya viwanda wilayani utaanza kwa lengo la kuongeza ajira kupitia kilimo, uvuvi, madini na mifugo.

Mageuzi makubwa yanakuja pia kwenye sekta ya maji. Serikali itaanza ujenzi wa gridi ya taifa ya maji ikihusisha vyanzo vikuu kama Ziwa Viktoria, Tanganyika, Nyasa na mito mikubwa, kuhakikisha kila Mtanzania anapata maji safi na salama. Vilevile, jitihada za nishati safi kupikia zitaimarishwa ili kupunguza utegemezi wa kuni na mkaa.

Katika utawala mpya, uwajibikaji utakuwa ni wa moja kwa moja. Mawaziri na wakuu wa mikoa watalazimika kutoa taarifa na kujibu maswali ya wananchi kwa njia ya moja kwa moja, hatua itakayojenga uwazi na kuimarisha imani kwa serikali.

Na zaidi ya yote, Rais Samia ameahidi kuendeleza mashauriano na wadau wa siasa, sekta binafsi na taasisi za kiraia, ikiwemo kuunda tume maalum ya kuandaa mazingira ya mchakato wa katiba mpya—ndoto kubwa ya Watanzania wengi.

“Tunajenga taifa lenye utu, mshikamano na fursa kwa wote. Kila Mtanzania ataguswa na mageuzi haya kuanzia kijijini hadi mjini. Huu ni wakati wa mshikamano wa kitaifa na safari hii si yangu peke yangu—ni safari ya Watanzania wote.”

Ziara hii ya Morogoro ni ishara ya mwanzo wa safari ya matumaini mapya. Ni wito wa mshikamano na mshikikano wa maendeleo.

 Dk. Samia akiwa Morogoro na Balozi Dk. Emanuel Nchimbi akiwa Mwanza wote wanabeba dira ya taifa—dira ya afya bora, elimu imara, uchumi shirikishi, heshima ya utu, na Tanzania yenye mshikamano wa kweli.

Huu ni wakati wa Watanzania wote, bila kujali mkoa, kabila au nafasi ya kijamii, kuungana na kuunga mkono juhudi hizi.

 Safari imeanza leo Morogoro, itafuata  Dodoma, kisha nchi nzima. Lakini safari hii ni ya Watanzania wote. Ni safari ya kujenga taifa la haki, mshikamano na ustawi—taifa la matumaini mapya.

Hapa chini ni matukio mbalimbali ya picha wakati wa uzinduzi wa kampeni hizo.