Mwenyekiti wa INEC, Jaji Mstaafu Jacobs Mwambegele, alitangaza leo jijini Dodoma kwamba wagombea waliopendekezwa na CCM wametimiza masharti yote ya Katiba ya Jamhuri ya Muungano wa Tanzania. Kauli hiyo siyo tu uthibitisho wa kisheria, bali ni baraka ya safari mpya ya kipekee ya kiongozi ambaye amegeuka kuwa dira ya matumaini ya Watanzania wote — Dk. Samia Suluhu Hassan.
Leo hii jijini Dodoma, Samia Suluhu Hassan na mgombea mwenza wake Dk. Nchimbi wamerejesha fomu rasmi za kuwania nafasi ya Rais na Makamu wa Rais wa Jamhuri ya Muungano wa Tanzania katika ofisi za INEC, Njedengwa. Tukio hili si hatua ya kawaida, bali ni alama ya upendo na mshikamano, likiwaalika Watanzania wote kujiunga katika safari ya pamoja ya kuijenga Tanzania mpya yenye heshima na matumaini.
Samia: Rais wa Upendo na Umakini
Katika kipindi chake cha uongozi, Samia ameandika historia kama Rais wa kwanza mwanamke nchini Tanzania, lakini pia kama Mama wa taifa aliyeongoza kwa moyo wa upendo na mshikamano. Uongozi wake umejengwa juu ya kusikiliza wananchi, kushirikisha kila kundi bila kujali jinsia, dini, kabila wala itikadi.
Ni katika uongozi wake tumeshuhudia Tanzania ikijengwa kwa maridhiano, diplomasia ya kisasa, na uchumi unaojikita katika miradi mikubwa ya kimkakati. Lakini zaidi ya yote, Samia ameonyesha kuwa siasa ni huduma ya upendo, siyo nafasi ya kugawanya watu.
Miradi Mikubwa, Maisha Bora
Hakuna anayeweza kupuuza kazi kubwa iliyoonekana chini ya uongozi wa Rais Samia. Kuanzia ujenzi wa reli ya kisasa (SGR), uwekezaji katika nishati, maboresho ya sekta ya elimu, afya, kilimo na huduma za jamii, hadi diplomasia iliyorejesha Tanzania kwenye ramani ya dunia — yote haya yanashuhudia upeo wa kiongozi huyu.
Kwa Samia, maendeleo ni kwa wote. Shule zimepanuka, hospitali zimeboreshwa, vijana wamepata nafasi mpya za ajira kupitia uwekezaji, wanawake wamepewa nafasi zaidi serikalini na kwenye maamuzi, na Tanzania imekuwa taifa linaloaminika kimataifa.
Nchimbi: Mshirika Sahihi kwa Safari Mpya
Kuteuliwa kwa Dk. Emmanuel Nchimbi kama mgombea mwenza ni ishara ya busara na usawa. Ni kiongozi kijana, mwenye uzoefu katika nyanja za kidiplomasia, siasa na utumishi wa umma. Nchimbi ni chachu ya nguvu mpya zitakazoongeza kasi ya mama Samia katika safari hii ya maendeleo na mshikamano wa kitaifa.
Kampeni ya Upendo, Tumaini la Ushindi
Kuanzia kesho, Agosti 28, 2025, kampeni rasmi zinaanza. Lakini tofauti na ushindani wa kawaida, safari ya Samia inatambulika kama mwendelezo wa upendo, mshikamano na mshikikiano wa Watanzania wote.
Samia haendi uwanjani kwa ahadi tupu; anakuja na rekodi, matendo na moyo wa kipekee wa upendo kwa taifa. Anakuja kama Rais aliyeishi na watu wake, aliyezungumza na kila mmoja, aliyeona changamoto na kuzigeuza fursa.
Kura ya Upendo
Oktoba 29 haitakuwa kura ya kawaida. Itakuwa kura ya kuthibitisha upendo, mshikamano na matumaini ya Watanzania. Ni kura ya kusema “Tunaona, tumeguswa, tunaamini, na tupo tayari kuendelea na wewe Mama Samia.”
Kwa kila mwananchi, kura kwa Samia ni kura ya familia bora, elimu bora, afya bora, diplomasia yenye heshima, na uchumi imara. Ni kura ya kuendeleza Tanzania yenye mshikamano na amani.
Hitimisho
Katika siasa, mara chache sana taifa hupata kiongozi anayeunganisha mioyo ya watu kwa njia ya upendo. Tanzania imepata nafasi hiyo kupitia Samia Suluhu Hassan. Ndiye Rais wa sasa, lakini pia Mama wa taifa, na chaguo sahihi la kesho.
Uchaguzi wa mwaka huu sio tu ushindani wa kura, bali ni mtihani wa kuamua kama Watanzania tunaendelea na mwendelezo wa amani na mshikamano au tunajaribu bahati. Jibu sahihi ni moja: Samia Suluhu Hassan – Rais wa Upendo, Tumaini la Watanzania.
Imeandaliwa na Victor Bariety -0757856284
0 Comments