Mwenyekiti wa CCM Taifa na Rais wa Jamhuri ya Muungano wa Tanzania Dkt. Samia Suluhu Hassan akihutubia wakati wa uzinduzi wa Kampeni za chama hicho Agosti 28,2025 Jijini Dar es Salaam.

...........................................

Chama cha Mapinduzi (CCM) leo kimeandika ukurasa mpya katika historia ya siasa za Tanzania baada ya kuzindua rasmi kampeni zake za Uchaguzi Mkuu wa Oktoba 29, 2025. Tukio hili, linalofanyika katika Viwanja vya Tanganyika Packers jijini Dar es Salaam, limebeba hamasa ya kipekee, kwani mgombea urais wa CCM na Mwenyekiti wa chama hicho, Rais Dkt. Samia Suluhu Hassan, amepokea rasmi kijiti cha kuongoza mbio za ushindi.

Kabla ya kuelekea uwanjani, Rais Samia alifanya dua maalum Ikulu jijini Dar es Salaam, akimkabidhi Mwenyezi Mungu jukumu la kuomba ridhaa ya wananchi kwa awamu ya pili. Dua hiyo imeonesha unyenyekevu na heshima yake kwa taifa na kwa imani za Watanzania wote, ishara kuwa safari ya kampeni hizi inalenga mshikamano, amani na mshindi wa kheri.

Mvuto wa Kampeni za CCM

Uzinduzi wa kampeni hizi umevuta hisia za mamilioni ya Watanzania ndani na nje ya nchi. Ni tukio linaloashiria dira mpya ya chama kinachoendelea kuaminiwa na wananchi kutokana na historia yake ya ushindi, sera madhubuti na utekelezaji wa miradi mikubwa ya maendeleo.

Katika uwanja huo, wanachama na wapenzi wa CCM wamefurika kutoka kila pembe ya taifa, wakiwa na matumaini makubwa ya kusikia dira na mipango mipya. Ahadi zinazotolewa na chama hiki si za maneno matupu, bali ni mwendelezo wa kazi kubwa zilizokwisha kufanyika katika sekta zote muhimu—kuanzia elimu, afya, miundombinu, nishati hadi kilimo.

Kikwete: "Samia ni Chaguo Sahihi"

Rais mstaafu Jakaya Mrisho Kikwete, akizungumza mbele ya maelfu ya wananchi, amesisitiza kuwa mchakato wa kumpitisha Rais Samia kugombea urais kwa tiketi ya CCM ulifuata utaratibu wa chama. Kwa mtindo wake wa ucheshi na hekima, Kikwete aliwakumbusha wanaobeza uteuzi huo kwamba kila mara CCM imempa fursa Rais aliyepo madarakani kumalizia vipindi viwili.

“Kwa nini leo iwe tofauti kwa Rais Samia? Tulifanya hivyo kwa Mkapa, tulifanya hivyo kwangu, tulifanya hivyo kwa Magufuli. Samia naye anastahili heshima hiyo kwa kazi kubwa alizofanya,” alisema Kikwete huku akipigiwa makofi na wafuasi.

Aliongeza kuwa Samia si kiongozi wa kawaida, bali ni kiongozi mwenye dira ya mbali, aliyekamilisha Dira ya Taifa ya Maendeleo 2050 na kuendeleza miradi mikubwa ya kimkakati bila kuyumba.

Samia: Ahadi za Kujenga Tanzania Mpya

Akihutubia maelfu ya wananchi, Rais Samia aliweka bayana kuwa dhamira yake kwa awamu ya pili ni kuimarisha mshikamano wa kitaifa na kushirikiana na wadau wote kuunda tume ya maridhiano. Kupitia tume hiyo, mchakato wa Katiba mpya utaanzishwa upya, jambo linalothibitisha dhamira yake ya kujenga taifa la maridhiano, mshikamo na heshima kwa demokrasia.

Katika ahadi zake za siku 100 za kwanza iwapo atachaguliwa, Rais Samia ametaja mambo makuu yafuatayo:

Bima ya Afya kwa Wote: Kuzindua mfumo utakaowezesha makundi maalum kama wazee, wajawazito na watoto kupata huduma za afya bure kupitia NHIF.

Matibabu ya Kibingwa kwa Wote: Serikali kugharamia matibabu ya saratani, figo, moyo na mifupa kwa wasiojiweza.

Ajira kwa Sekta ya Afya na Elimu: Kuajiri wahudumu wa afya 5,000 na walimu 7,000 wapya ili kuboresha huduma za kijamii.

Mitaji kwa Vijana na Wajasiriamali: Shilingi bilioni 200 zitatengwa kusaidia kampuni changa na miradi ya vijana.

Kuwezesha Elimu Bora: Kila mtoto wa darasa la tatu kuhakikisha anajua kusoma na kuandika, huku wanafunzi wa VETA wakipewa nafasi za vitendo viwandani.

Kwa Nini CCM?

CCM inabaki kuwa chama pekee kinachoaminiwa na Watanzania wengi kwa sababu ya historia yake ya uadilifu na utekelezaji. Wananchi wanapozungumza kuhusu maendeleo ya kweli—barabara, umeme, shule, hospitali, na ajira—mara zote majibu yanarejea kwa CCM.

Hali hii inatofautisha chama hiki na wakosoaji ambao mara nyingi hujikita kwenye lawama bila kutoa mbadala wa sera. CCM imejidhihirisha kuwa si chama cha maneno bali cha vitendo, na katika uongozi wa Rais Samia, Watanzania wameona mageuzi makubwa yenye matokeo ya moja kwa moja kwa maisha yao.

Hitimisho

Kampeni za CCM mwaka huu sio za maneno makali bali za matumaini. Ni kampeni zinazomlenga mwananchi wa kawaida: mkulima, mfanyabiashara mdogo, kijana mtafutaji, mama wa nyumbani na kila Mtanzania anayetaka maisha bora.

Rais Samia Suluhu Hassan amejipambanua kama mama wa taifa, kiongozi wa maridhiano na mshindi wa maendeleo. Kupiga kura kwa CCM ni kuchagua amani, mshikamano na mustakabali bora wa taifa.

Watanzania kwa kauli moja wanalo jukumu la kusema: “Samia ni wetu, CCM ndiyo chaguo letu.”

..........................................

Picha za matukio mbalimbali ya uzinduzi huo.















 Imeandaliwa na Victor Bariety – 0757 856 284